X
تبلیغات
رایتل

پهره..وبلاگ فرهنگی هنری وادبی بلوچستان

ترانگ ءِ شهکـَوْر

Good Bye until Tomorrow - Sunset in De Haan Belgium by Batikart.


علی بخش دشتیاری

ترانگ ءِ شهکـَوْر

چنڈیت چادر ءَ سیاهیں شپ
روچ چو نگرهی مانشانیت
شپدرنگ ءَ بج انت آزاور
چیزے گوں کپرکیں بالاں

چیزے شاهل ءُ سرٹالاں

برے گوالگ و گونچانی
برے کاسگی پنڈوگر

کش انت هر در ءَ اللهے
گندئے تو ادا دنیا انت
رنگ رنگ ءَ سر انت بنی آدم
چندے مهلباں اتاریت
چندے هنّیاں مینان انت
برے اندوهاں سربار انت
برے وَشّیاں گرانبار انت
چندے په شَلَگ ارسانی
تر کنت دامن سرجیگاں
برے باوت ءُ هیرانی
اوشتاتگ دل ءِ چار راه ءَ
هار کت ترانگ ءِ شهکور ءَ
آ چار کج ات انت من دور ءَ
چاراں که دلوں ویران انت
اوست ءِ سرزمین هشکان انت
واهگ سیرکگ ءُ هینّار انت
زندے بے وس ءُ بے کار انت
زردے انگراں سهریناں
سجگ ءُ برجان انت هر وهد
گرستگ دل منی نازاکیں
زئیری منجلاں لهڑیناں
نستاں راهسراں مهرانی
کاگد کـَشّ اتوں شئیرانی
چار گالوں بلوچی گوشتگ
گریانیں دلوں سهڑینتگ
لنجیں شپ « عل‍ی » آگاهی
نشتگ گلزمین نازینتگ


چاهبهار _ کـورسر